ማዕዶት አንቀጸ ወራዙት እና የወጣቶች ተግባራዊ ክርስቲያናዊ ሕይወት

ማዕዶት፡- ወደ መንፈሳዊነት አብረን እንሻገር!

"ጥበበኞቹም እንደ ሰማይ ፀዳል፥ ብዙ ሰዎችንም ወደ ጽድቅ የሚመልሱ እንደ ከዋክብት
 ለዘላለም ይደምቃሉ" (ትንቢተ ዳንኤል 12÷3)

በቤተክርስቲያናችን አስተምህሮ መሠረት "ማዕዶት" የሚለው ቃል "መሸጋገር" ማለት ነው። ይህ ገጽ ለመንፈሳዊ ሕይወት ልዩ ትኩረት የሚሰጥ ሲሆን፤ ከኃጢአት ጨለማ ወደ ክርስቶስ ብርሃን የምናደርገውን መንፈሳዊ ጉዞ የሚዳስስ ነው። "አንቀጸ ወራዙት" የሚለው ሐረግ ሁለት ቃላትን የያዘ ሲሆን፤ አንቀጽ ማለት በር፣ መግቢያ፣ ወይም መተላለፊያ ሲሆን ወራዙት ደግሞ ወጣቶች ማለት ነው። በአጠቃላይ "አንቀጸ ወራዙት" ማለት "የወጣቶች መግቢያ" ወይም "የወጣቶች በር" የሚል ትርጉም የሚሰጥ ሲሆን፤ በመንፈሳዊ አውድ ሲተረጎም ወጣቶች ወደ መንፈሳዊ ሕይወት፣ ወደ እውቀት እና ወደ ትክክለኛው የክርስቲያናዊ ምግባር ጎዳና የሚገቡበት መድረክ ማለት ነው።

በዚህ ገጽ ላይ የሚቀርቡት መንፈሳዊ ስብከቶች እና ትምህርቶች በፅንሰ-ሃሳብ ላይ ብቻ የተገደቡ ሳይሆኑ፣ በመጽሐፍ ቅዱስ ታሪኮች በመታገዝ በጾም፣ በጸሎትና በንስሐ የታጀበ ተግባራዊ ክርስቲያናዊ ሕይወት እንዴት መኖር እንደምንችል የሚያሳዩ ናቸው። እነዚህን ትምህርቶች ስታነቡና በሕይወታችሁ ስትተገብሯቸው፣ በሃሳቡ ልዕልና ከመሬታዊው ጭንቀት ወደ ሰማያዊው ሰላም ትሻገራላችሁ። የእግዚአብሔር ቃልና የአባቶቻችን ምክር ልክ እንደ ብርሃን ፋኖስ እየመራችሁ፣ በሥራችሁ፣ በትዳራችሁና በማህበራዊ ግንኙነታችሁ ሁሉ ውስጥ ክርስቲያናዊ ምግባርን እንዴት መላበስ እንደምትችሉ ትማራላችሁ።

ቅዱስ ጳውሎስ "ፊተኛ ኑሮአችሁን እያሰባችሁ እንደሚያታልል ምኞት የሚጠፋውን አሮጌውን ሰው አስወግዱ፥ በአእምሮአችሁም መንፈስ ታደሱ፥ ለእውነትም በሚሆኑ ጽድቅና ቅድስና እንደ እግዚአብሔር ምሳሌ የተፈጠረውን አዲሱን ሰው ልበሱ" ብሎ እንደተናገረው (ኤፌሶን 4፥22-24)፤ በዚህ የመሸጋገር ገጽ ላይ በሃይማኖት ጸንቶ፣ በምግባር አጊጦ ወደ እግዚአብሔር መንግሥት የምናደርገው የጋራ ጉዟችን ነው።

 

 ወደዚህ የሕይወት ትምህርት መድረክ እንኳን በደህና መጣችሁ!
 
 ማዕዶት፡- ወደ መንፈሳዊነት አብረን እንሻገር!

 

 በመምህር ያዕቆብ ሰንደቁ አዘጋጅነት