ስብከት - እውነተኛ መለኪያው

 እውነተኛ መለኪያው ምንድን ነው?

በየዓመቱ የዐቢይ ጾም ወቅት ሲመጣ፣ ብዙዎቻችን ትኩረታችንን የምናደርገው በምንበላው ምግብና በጸሎት ሰዓታችን ብዛት ላይ ነው። ሆኖም ግን፣ የክርስቲያናዊ ሕይወት እውነተኛ መለኪያው ምንድን ነው? የግብጽ ኦርቶዶክስ ሊቀ ጳጳስ አቡነ ዮሴፍ (H.G. Bishop Youssef) በየዓመቱ ለምእመናን በሚያስተላልፉት መልእክት፣ መንፈሳዊነትን ከውጫዊ ሥርዓት ወደ ውስጣዊ ማንነት በሚመልስ አዲስ መነጽር እንድንመለከተው ያሳስቡናል።

 እንደ አቡነ ዮሴፍ አስተምህሮ፣ እውነተኛ መንፈሳዊ ሕይወት የሚለካው በምንሠራው ሃይማኖታዊ ተግባር ብቻ ሳይሆን፣ በዚያ ተግባር አማካኝነት በውስጣችን በሚፈጠረው "የሥነ-ምግባር ለውጥ" ነው። ሊቀ ጳጳሱ  እንዲህ ይላሉ፦ "በቀን ውስጥ ስንት ሰዓት ጸለይክ? ከሚለው ይልቅ፣ በቀን ውስጥ ስንት ጊዜ ትዕግሥት አሳየህ? ስንት ጊዜስ ቁጣህን ተቆጣጠርክ? የሚሉት ጥያቄዎች እውነተኛ መንፈሳዊነታችንን ይለካሉ።"

 ፩. ከሃይማኖታዊ ሥርዓት ወደ መንፈሳዊ ሥነ-ምግባር

 ብዙውን ጊዜ ሃይማኖታዊ ሥርዓቶችን እንደ "ግዴታ" እንፈጽማቸዋለን። ነገር ግን ጾምና ጸሎት በራሳቸው ግብ ሳይሆኑ፣ ወደ ግቡ የሚያደርሱ "መንገዶች" ናቸው። ግቡ ደግሞ የክርስቶስን ባሕርይ መላበስ ነው። አንድ ሰው ሦስት ሰዓት ቆሞ ቢጸልይ፣ ነገር ግን ከጸሎት በኋላ ለቤተሰቡ ወይም ለሥራ ባልደረቦቹ ፍቅርና ትዕግሥት ማሳየት ካልቻለ፣ ጸሎቱ ግቡን አልመታም ማለት ነው። መለኪያው በጸሎት ያገኘነው ሰላም በፈተና ወቅት ቁጣን ለመግታት ሲረዳን ብቻ ነው እውነተኛ የሚሆነው።

 ፪. የትዕግሥትና የቁጣ መቆጣጠር ሚዛን

 ሊቀ ጳጳስ አቡነ ዮሴፍ በመልእክታቸው እንደሚሉት፣ መንፈሳዊ እድገታችን የሚታየው በገዳም ወይም በቤተክርስቲያን ውስጥ ሳይሆን፣ በሕይወት ውጣ ውረድና በሰው መካከል ነው። በምናስቀይማቸውና በሚያስቀይሙን ሰዎች መካከል ሆነን የምናሳየው ትዕግሥት፣ ከሺህ ስግደቶች በላይ የእግዚአብሔር መንፈስ በውስጣችን መኖሩን ይመሰክራል። ጸሎታችን እውነተኛ ከሆነ፣ ልባችንን እንደ ሰም ያለሰልሰዋል፤ ንዴታችንን ያበርደዋል፤ ሌሎችን ይቅር እንድንልም ጉልበት ይሆነናል።

 ፫. የዐቢይ ጾም እውነተኛ ዓላማ

 ጾም የሥጋ ፍላጎትን ለነፍስ ማስገዣ መሣሪያ ነው። አንደበታችንን ከክፉ ቃል ካልከለከልን፣ ሆዳችንን ከምግብ መከልከላችን ትርጉም አይኖረውም። የአቡነ ዮሴፍ መልእክት ግልጽ ነው፦ እውነተኛ መንፈሳዊ ሰው ማለት በትሕትናው የሚታወቅ፣ ሰውን የማይፈርድና በፈተና ወቅት ራሱን የሚገዛ ሰው ነው።

 ማጠቃለያ፦  በእውነተኛ መለኪያው ራስን ሕይወት መመርመሪያ ጥያቄዎች 

 ለዘንድሮው የዐቢይ ጾም ጉዞህ እነዚህን ሦስት ጥያቄዎች የዕለት ተዕለት መለኪያህ አድርጋቸው፦

 ዛሬ በትዕግሥት ማለፍ የሚገባኝን ስንት አጋጣሚዎች በንዴት አበላሸሁ?

 ጸሎቴ ለሰዎች ካለኝ አመለካከትና አያያዝ ጋር ይጣጣማል?

 ጾሜ በሥነ-ምግባሬ  ላይ ምን ዓይነት ለውጥ አመጣ?

 በመጨረሻም፣ ክርስቲያናዊ ሕይወት የሥነ-ምግባር ለውጥ እንጂ የቃላት ድርድር አይደለም። ጌታችን በወንጌል "ከፍሬያቸው ታውቋቸዋላችሁ" እንዳለ፣ መንፈሳዊነታችን የሚታወቀው በምናሳየው የፍቅር፣ የሰላምና የትዕግሥት ፍሬ ነው።

#ክርስቲያናዊ #ሥነ-ምግባራችንን #በእውነተኛ #ሚዛን እንለካው!

ይቆየን፡፡

#ዐቢይ ጾም #መንፈሳዊ  #ክርስቲያናዊ #ሕይወት #እውነተኛ ሚዛን!

ያዕቆብ ሰንደቁ

የካቲት 14 ቀን 2018 ዓ/ም

አዲስ አበባ

ምንጭ፦ Coptic Orthodox Diocese of the Southern United States (SUS Copts) - H.G. Bishop Youssef, Annual Great